من اناانا يالمليت الريد جواي
انا ياني ذاتي وزي زمان...
لا غير القرب القريب
لا أثر البعد اللي كان...
اتغيّر التاريخ جواي
وطول المسافات والمكان ...
لكني لسع بعشقك
ولساي على العهد الزمان...
ولسة القليب بيمجدك
حتى الاحاسيس والحنان...
لسة اتجاها على الامان
.
.
انا يا المليت الريد جواي
لسة الشرايين تنبضك
وجواي كتير بتنفسك
وما بقدر انساك واكرهك
ولا اني اقدر حتى يوم
ارميك في يوم واجدعك
لكني من جواي خلاص
تعبت كل يوم اندهك
وتعبت بي طول الزمن
من جور غرام اتوسدك
قلبا مشلهت كل يوم
يتوضأ بي موية هواك
شان يلحق المعشوق فرض
خليتو فيك يبقى الامام
خليتو ساجد في الارض
والنافلة فيك سواها زين
كان شفتو في يوم اعترض؟؟
زكيت دماي عن الغرام
وحجيتو ريدك من زمان
وان طفتو بالطول والعرض
بعدك خلاص انا صايمة تب
لا حب وريد بعد حرد
وهسع بقينا وفي الوصف
زي زول بتاوق في السما
والتاني مدفون في الارض
.
.
.
انا يالمليت الريد الريد جواي
لساي بناديك شان تزيد
وتفتّح الاشواق جواي
والدنيا لي تملاها عيد
وانا شايلة منك طفلي ريد
ربيتو جواي من زمن
كان العلي وعليك عنيد
كبرتو شان يبقالي زول
تاريهو عندك بس وليد
وزي اي شي شي بس ياهو ريد
.
.
.
انا يالمليت الريد جواي
لساي بحاول اكتشف
سر العشق الفيني ليك
ومالي بحسو انا مختلف
ما تقول زمان قيس ليلى كان
او كان بحبها بيعترف
او عنترةزول عبلة داك
عرف العشق وفيهو احترف
اتحدى ريد الريد يكون
زي ريدي ليك دة اكيد اخف
انا من غرامك لو تحس
جسمي بيقشعر ويرتجف
حافظة الولف جواي زين
خاتمة الغرام حرف حرف
وجودتو جواي الشعر
من يائو لحد الالف
وانا عارفة اني الريدتو دة
بيكون مميز مختلف
لكنك انت على العليك
متخيل الريد زي ظرف
طارئ شديد ممكن
يزول بمسكة للايد ويتخطف
.
.
.
انا يا المليت الريد جواي
لساي بشتاق زي زمان
لكن زمان كان بي احن
لساي بموت من شوقي ليك
وبسمع قليبي وقت يئن
شايفاك قصادي هداك هنا
لكني من شوفتك بجن
بلمس ايديك زي الهوا
ما بحسها
بلمح عيونك ونظرتها
ما بحسها
كلمة بحبك زي زمان
ما بحسها
لكنو طيفك لو لمس
ايدي بسمع كمان حتى النفس
وبحس بي كلمات وصوت وعبراتو في ساعةالهمس
مشتاقة ليك
يا طيف تعال
انا في حاجتك امس
ارجع وحاتك يا زمان
خليني اعيش جوة الامس
ياخ نوّر التحنان تعال
خليني اضوق طعم الشمس
بس ياخ تعال
وانا يالمليت الريد جواي
ما بعرف الجمع والحساب
لكني بعرف حاجة بس
اانا+انت =روح
الروح ما تقبل طرح
يا نص يجيك واموت انا
ما واضحة ما دايرة الشرح
ومربع الريد لو يكون تحت الجذر=انت بلا انا
و= عندي انا الجرح
مضروبة في اكبر مقام
ولسة بتفكر في الشرح
م
اضافة تعليق